Një 46-vjeçar është arrestuar ditën e sotme në Sarandë pasi akuzohet për grabitje.
Blutë bëjnë me dije se në pranga ka rënë Jorgo Kumarku, i cili është kapur në flagrancë duke vjedhur 3 televizorë dhe sende personale të pushuesve, në një hotel në Livadhja.
Ndërkohë ky shtetas është një emër i dëgjuar për policinë, pasi rezulton të jetë dënuar më herët për vepra të ndryshme penale.
“Në vijim të veprimeve, u bë arrestimi në flagrancë i shtetasit Jorgo Kumaraku, 46 vjeç, banues në Sarandë.
Jorgo Kumaraku alias Leonard Kumaraku, rezulton i dënuar në vitin 2022 me 1 vit e 4 muaj burg për “kanosje” dhe “prodhim dhe mbajtje pa leje të armëve të ftohta”. Në vitin 2007 ka grabitur duke kërcënuar me armë lodër punonjësen e kazino “Perla” në Sarandë, ngjarje për të cilën është dënuar me 5 vjet burg.
Në vitin 2008 i është gjetur në qeli një celular, për të cilin ka dhënë deklaratë të rremë sikur e kishte futur në qeli një polic i paraburgimit Sarandë. Ky i fundit u arrestua, por u la i lirë pasi u zbulua gënjeshtra e Kumarakut, duke bërë që ky i fundit të dënohej me 6 muaj burg.
Në shtator 2013 me një pistoletë lodër dhunoi dhe grabiti punonjësen e kazino “Admiral” ne Sarandë. Një ditë pas ngjarjes së Sarandës, dhunoi dhe grabiti me pistoletë lodër punonjësen e një kazinoje tek Ura e Lumit në Gjirokastër. Kumaraku është përdorues narkotikësh dhe i dënuar në Greqi për “trafik narkotikësh”,- njofton Policia.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Sarandë, për veprime të mëtejshme.
