Ish-zv.kryeministri Arben Ahmetaj ka reaguar nga arratia në lidhje me kontrollin e ushtruar ditën e sotme nga Byroja Kombëtare e Hetimit pas vendimit të GJKKO-së për ushtrimin e kontrollit në banesat e të afërmëve të tij.
Në një postim në rrjetet sociale, Ahmetaj e konsideron kontrollin e BKH-së si raprezaljen e radhës në familjen e tij, duke filluar nga mosha 82-vjeç e poshtë, sipas tij. Ai shton më tej se pleqëve u janë sekuestruar telefonët në kërkim të provave për “inceneratorët”.
Ai ka një reagim dhe në lidhje me deklaratën e gazetarit Poli Hoxha, i cili në një intervistë televizive tha se bashkëjetueses së deputetit socialist i janë gjetur mbi 1.8 milionë euro transferta bankare në një bankë në Zvicër. Ahmetajt e konsideron këtë lajm si një “fake news” të prodhuar në laboratorët e ortakërisë mediatike dhe jo vetëm, të inceneratorëve.
“Sot u bë raprezalja e rradhës në familjen time, nga mosha 82 vjeç e poshtë. Madje pleqve iu janë marrë dhe celularët, në kërkim të provave për “inceneratorët”.
Ndërsa “spin doctor”/kontakt inceneratorësh, ka qarkulluar lajmin e rremë se qenkan transferuar 1,8 milionë euro…Në vend të merren me fondet e inceneratorëve, merren me 1,8 milione euro imagjinarë. Fake news e prodhuar në laboratorët e ortakërisë mediatike dhe jo vetëm, të inceneratorëve ….” – shkruan Ahmetaj.
Kujtojmë se SPAK ka lëshuar për të një urdhër-arresti, ku edhe Kuvendi vendosi të premten për heqjen e imunitetit të tij. Por, ish nr.2 i qeverisë prej disa ditësh është larguar nga Shqipëria dhe sipas avokatëve të tij, ai ndodhet në Britaninë e Madhe.
Sot, GJKKO vendosi për ushtrimin e rreh 15 kontrolleve në banesa të të afërmëve të Arben Ahmetajt. Burime bëjnë me dije se në mëngjes u ushtrua kontroll tek banesa në Lalëz e babait të Eriola Hoxhës, partnere e Arben Ahmetajt. Mediat raportuan se objekt i bastisjeve kanë qenë edhe disa biznesmenë që kanë pasur bashkëpunim dhe kontakte me ish-zv.kryeministrin Ahmetaj. Gjatë kontrollit, për shkak të mungesës së pronarëve, prezent ishin avokatët e ish-ministrit.
Mësohet gjithashtu se sot Gjykata e Posaçme kundër Korrupsionit dhe Krimit të Organizuar ka vendosur sekuestro preventive ndaj 4 banesave në kuadër të hetimeve që po zhvillohen ndaj ish-zv/Kryeministrit Arben Ahmetaj. Raportohet se këto apartamente në Tiranë dhe në zonën e Hamallajt në Durrës dyshohet se kanë qenë në pronësi të Ahmetaj dhe më pas të jenë shitur tek persona të tjerë në mënyrë fiktive.
