Një 18 vjeçar është arrestuar në Sarandë, pasi shpërndante kokainë në lokalet pranë bregdetit.
I riu e shpërndante lëndën narkotike me një motorr, për të cilin nuk kishte leje drejtimi, ndërsa gjatë kontrollit i është gjetur dhe një thikë. Edhe kokaina dhe thika i janë sekuestruar në cilësinë e provës materiale.
“Shërbimet e Policisë kanë ndaluar në rrugën “Kanali i Çukës”, një motomjet që drejtohej nga një 18-vjeçar, i cili nuk ishte i pajisur me leje drejtimi.
Gjatë kontrollit të ushtruar ndaj drejtuesit të këtij motomjeti, shtetasit N. H., 18 vjeç, banues në fshatin Gjashtë, Sarandë, në çantën e supit shërbimet e Policisë i gjetën një sasi lënde narkotike cannabis sativa të ndarë të doza të gatshme për shitje dhe një armë të ftohtë (thikë).
Në vijim të veprimeve procedurale për këtë rast, specialistët për Hetimin e Narkotikëve bënë arrestimin në flagrancë të 18-vjeçarit, si dhe sekuestrimin e lëndës narkotike, thikës dhe motomjetit”,– njofton policia.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Sarandë, për veprime të mëtejshme.
