Presidentja e Kosovës, Vjosa Osmani ka reaguar për dhunën e ndodhur në Kuvendin e Kosovës në seancën e sotme parlamentare.
Osmani tha se sot i është bërë një dëm i madh institucioneve nga dhuna e përdorur në Kuvendin e Kosovës. Ajo shtoi se “dhuna nuk ka vend në tempullin e demokracisë” dhe se ajo “nuk mund të shndërrohet në mjet politik”.
“Përdorimi i dhunës fizike si mjet për t’i adresuar pakënaqësitë, dallimet apo mosmarrëveshjet politike është dëmi më i madh që mund t’i bëhet institucioneve që janë ndërtuar me aq shumë mund e sakrificë.
Kuvendi është gurthemeli i shoqërisë sonë demokratike, ku zëra të ndryshëm bashkohen për t’i përfaqësuar interesat e qytetarëve, ndaj dhuna nuk ka vend në tempullin e demokracisë dhe nuk mund të shndërrohet në mjet politik.
Duhet ta riafirmojmë përkushtimin tonë ndaj demokracisë, mendimit ndryshe, sikurse edhe respektit të ndërsjellë, duke u mbështetur në sundimin dhe respektimin e ligjit”– tha Osmani.
