Parlamenti Europian ka miratuar raportin për Shqipërinë të paraqitur nga Isabel Santos, ndërsa eurodeputetët e grupimeve të ndryshme politike kanë paraqitur kritikat e tyre lidhur me atë se çfarë duhet të bëjnë autoritetet shqiptare. Liria e media, lufta ndaj korrupsionit apo amnistia fiskale, një nismë e hedhur për diskutim nga Kryeministri Edi Rama, kanë qenë çështjet që janë përmendur më shumë nga përfaqësuesit e grupimeve parlamentare në PE.
David Lega, i grupimit Kristian-Demokrat, në fjalën e tij vuri në dukje se vitin e kaluar Bashkimi Europian hapi negoicatat me Shqipërinë, por qënia pjesë e BE nuk duhet të jetë një proces i lehtë dhe i shpejtë. Sipas tij, rruga për në BE duhet të kalojë nga modernzimi dhe fuqizimi i shtetit të së drejtës, por edhe forcim të stabilitetit të brendshëm.
“Mendoj se për Shqipërinë janë disa çështje kryesore të cilat kanë nevojë për shqyrtim:
Së pari nevojitet një politikë e jashtme e përbashkët për sa i përket përgjigjes se agresionit rus në Ukrainë.
Brenda vendit shumë reforma janë të nevojshme. Njëra ka të bëjë me lirinë e medias dhe të shprehjes. Dhuna ndaj gazetarëve duhet të ndalojë. Drafti dhe legjislacioni për reformimin e medias online është i papranueshëm”, tha Lega.
Ilhan Kyuchyuk, i Aleancës së Liberal Demokratëve, tha se Shqipëria ka demonstruar disa angazhime strategjike. Sipas tij, kjo lidhet me situatën me partitë politke. “Por vendi ka nevojë për marrëdhënie të mira me fqinjët. Ky angazhim tregon momentin e harmonisë për tërë rajonin”, shtoi ai.
Mick Ëallace nga Grupimi i të Gjelbërve, u fokusua te liria e mediave dhe lufta ndaj krimit të organizuar. Gjithashtu ai vuri theksin te nevoja për mbrojtjen e minoriteteve. “Ndasitë mes partive politike janë të zakonshme atje. Kur vjen puna tek mbrojtja e fëmijëve dhe dhuna e brendshme, vendi ka shumë për të bërë”, theksoi ai.
Angel Dzhambazki, Grupimi Konservator Reformist, foli për progresin e bërë, por tha se Shqipëria duhet të bëjë reforma. “Amnistia fiskale është një rrezik dhe duhet marrë në shqyrtim. Tirana duhet të reformojë se ka vullnet të mirë për të bërë reforma dhe luftën ndaj krimit dhe korrupsionit duhet ta forcojë. Njohjen e minoritetve dhe sidomos ato bullgare janë mëse të nevojshme”, tha Dzhambazki.
Anna Bonfriscko, Grupimi Demokratik dhe Identitar, ka vlerësuar kontributin e Shqipërisë në luftën kundër Rusisë në Ukrainë. “Duam një partnership të ri me atë vend. Europa ka nevojë për Ballkanin”, tha ai.
Fabio Castaldo, Grupimi i Paanshëm, ka vënë sërisht theksin te liria e medias dhe lufta kundër korrupsionit, si gjërat më të rëndësishme. Ai gjithashtu ka sjellë në vëmendje sulmin kibernetik ndaj Shqipërisë nga shtete jo mike.
