Valter Bami do të qëndrojë në burg gjatë hetimeve ndaj tij. Kështu vendosi Gjykata e Tiranës në seancën për masën e sigurisë ndaj 37-vjeçarit i cili është arrestuar për armëmbajtje pa leje, dhe është i dyshuar për atentatin e ndodhur në Larushk rreth një javë më parë.
Kujtojmë se në atentatin ndaj biznesmenit Gentian Bejtja, në Larushkë, mbeti i vrarë Ramazan Sino 28 vjeç dhe u plagosën dy fëmijët e mitur të biznesmenit Bejtja. Kur ndodhi ngjarja Bejtja ndodhej në makinë me ta, por pak minuta para se të mbërrinte në vilën e tij në Larushk, ai zbriti nga makina duke i shpëtuar atentatit. Valter Bami pretendon se nuk ka lidhje me ngjarjen, se ka qenë në banesën e tij kur ka ndodhur krimi.
Valter Bami dhe Gentjan Bejtja janë në përplasje të forta mes tyre vitet e fundit pasi dy vëllezërit Bami kanë dyshime të forta se Bejtja mund të flasë dhe dëshmojë për shumë krime të tmerrshme që kanë ndodhur në zonën e Krujës.
- Avokati: Ishte me fëmijët kur ndodhi ngjarja
Sipas avokatit të tij, Valter Bami, disa orë para atentatit ndaj Gentian Bejtjes në fshatin Larushk ka lëshuar një fishekzjarr për ditëlindjen e të motrës, megjithatë nuk e përjashton mundësinë që mikro-grimcat e gjetura te kyçi i dorës të jenë të armës së tij sportive, pasi sipas Bamit shpesh e pastron armën.
Avokati i tij mbrojtës Ilir Murati e cilësoi vendimin vendimi e gjykates si të padrejtë dhe të ndikuar nga presioni i opinionit negative mbi klientin e tij.
“Patëm debate me prokurorinë, kemi provën e fortë për lejen e armës sportive. Nje mikrogrimc baruti bëhet arme, kjo është e tmerrshme. Gjykata në pozicion shumë të dobët vepron nga presioni”, tha avokati.
Murati shtoi se klienti i tij në momentin që ndodhi atentati në Larushk ka qenë në banesë me familjarët dhe këtë sipas tij e vërteton telefoni cellular.
“Klienti im spjegoi që në orën që ndodhi ngjarja ka qenë në banesë me bashkëshorten dhe fëmijët. Ka vënë në dispozicion aparatein telefonik të ndezur, në të cilin janë pamjet filmike të qëndrimit të tij, pasi telefoni memorizonte pamjet e lëvizjes së klientit tim. Ne shokohemi nga këto informacion, pasi në gjykatë nuk i atribuohet vrasja e ndodhur. Valter Bami akuzohet për armëmbajtje pa leje për një mikrogrimcë baruti”, tha avokati.
