Pronari i klubit legjendar anglez, Millwall, John Berylson vdiq në një aksident të rëndë me makinë, konfirmojnë mediat angleze.
Edhe klubi i Millwall ka lëshuar një deklaratë, ndërsa për momentin nuk dihen detajet e qarta të aksidentit.
“Me pikëllim të madh informojmë publikun se John Berylson, pronari i klubit ka ndërruar jetë. Të gjithë në klub i gjenden pranë gruas së tij Amy dhe tre fëmijëve të tij, si dhe pjesës tjetër të familjes së tij. Vdekja e papritur e John-it do të ndikojë tek të gjithë ata që patën fatin ta njohin. Ai ishte një njeri i madh, tepër i përkushtuar ndaj familjes së tij dhe një person me bujari, ngrohtësi dhe dashamirësi të madhe. Ai kishte një jetë të plotë, plot ngjyra dhe mirësi, gëzim”, thuhet në njoftim.
Klubi i Championship tha se ata kanë mbetur me zemrën e thyer, ndërsa homazhe për presidentin e tyre të ndjerë janë bërë nga tifozët dhe ekipet rivale.
West Ham, Derby, Portsmouth dhe Bournemouth ishin ndër klubet e para që dërguan ngushëllime, por dhjetëra të tjerë pasuan në një vërshim të madh respekti për biznesmenin amerikan, i cili la pas gruan Amy dhe tre fëmijë.
Biznesmeni dhe milioneri amerikan mbërriti në krye të Millwall-it 17 vjet më parë dhe me familjen e tij themeloi një fondacion që ishte përgjegjës për të ndihmuar fëmijët në arsimim.
Mediat britanike shkruajnë se ai ka investuar më shumë se 100 milionë euro në klub.
Ai e mori drejtimin pasi klubi ra në kategorinë e tretë dhe me dy sezone të luajtura në atë rang, skuadra nga pjesa lindore e Londrës është pjesëmarrëse standarde në Championship.
Berylson dërgoi gjithashtu klubin nga Londra deri në gjysmëfinalet e FA Cup në 2013, dhe më pas në çerekfinale në 2017 dhe 2019.
