Kryetari i PD, Sali Berisha u ka bërë thirrje demokratëve dhe qytetarëve të Rrogozhinës që “të mbrojnë fitoren e zgjedhjeve të 14 majit në këtë Bashki”.
Ai u shpreh se Rrogozhina votoi për Shkëlqim Hoxhën, por që në mënyrë absurde verdikti u rrëzua nga vendimi i KAS dhe Kolegjit Zgjedhor.
Berisha i bëri këto komente gjatë një takimi me strukturat e PD dhe fushatës elektorale për Bashkinë e Rrogozhinës gjatë ditës së djeshme.
Në Bashkinë e Rrogozhinës zgjedhjet do të përsëriten.
Berisha shprehu mirënjohje për të gjithë ata që votuan në zgjedhjet e 14 majit për kandidatin e opozitës, Shkëlqim Hoxha.
Kryedemokrati u shpreh se përballë qytetarëve dhe opozitës është makineria e një shteti e cila bën gjithçka për tjetërsimin e votës, ndaj tha se kërkohet shumëfishim i përpjekjeve për të mbrojtur fitoren.
Berisha kërkoi nga strukturat një punë serioze me të gjithë votuesit për t’i afruar ata në kutinë e votimit.
Kryetari i PD shprehu bindjen se edhe Rrogozhina duke votuar për Shkëlqim Hoxhën do t’i bashkohet Kavajës “për t’u kthyer në djepin e ndryshimit për të gjithë Shqipërinë”.
