Zbardhen të tjera detaje tragjike nga ngjarja e rëndë që ndodhi mbrëmë në Larushk të Krujës, ku u qëllua me armë zjarri drejt banesës së Gentjan Bejtjas.
Nga të shtënat me armë mbeti i vrarë kunati i tij, Ramazan Sino si dhe u plagos djali i Bejtjas, Alvi Bejtja, 13 vjeç.
Nga vendi i ngjarjes mediat raportojnë detaje të tjera të rënda në lidhje me atentatin mafioz, ndërsa krimi mund të kishte marrë përmasa më të mëdha. Sipas burimeve të ndryshme mediatike bëhet me dije se brenda shtëpisë 3-katëshe kishte edhe 3 fëmijë të tjerë të cilët ishin duke luajtur në oborrin e banesës.
Autorët (3 persona), dy ekzekutorë dhe një shofer, pasi kanë ndjekur viktimën, 29 vjeç, dhe nipin e tij, i kanë qëlluar me kallashnikov nga një distancë rreth 20 metra, ku ata ishin futur në oborrin e banesës.
Ndërkohë, i mituri ndodhet në gjendje të rëndë në spitalin e Traumës, ndërsa i është nënshtruar një ndërhyrje kirurgjikale. Po ashtu bëhet e ditur se në momentin kur policia shkoi në vendin e ngjarjes, nuk gjeti Gentjan Bejtjan në banesën e tij.
