Virusi i rënë në fermat e derrave në rajonin e Ballkanit ka vënë në alarm dhe Shqipërinë.
Këtë të martë është mbajtur një takim i përbashkët mes Ministrisë së Bujqësisë, veterineve dhe gjuetarëve, ku u paraqit një situatë për ndikimin e të ashtuquajturës murtaja e derrit afrikan. Nga ministria u konfirmua se në vendin tonë nuk ka ende asnjë rast.
“Jemi fatlumë që deri në momentin që flasim nuk kemi përhapje të murtajës afrikane të derrave në Shqipëri,” tha përfaqësuesja e ministrisë.
Ekspertët sqaruan se sëmundja nuk prek njerëzit. “Gjëja kryesore është se murtaja afrikane e derrave nuk është një sëmundje zonotike, pra nuk prek njerëzit,” tha ai.
Autoritetet kërkuan nga veterinerët të raportojnë kur ka simptomat dhe gjuetarët për çdo kafshë të ngordhur që mund të gjejnë në pyje. “Të ketë mundësi të alarmojë strukturat kontrolluese për të bërë të mundur edhe minimizimin dhe parandalimin e përhapjes,” tha ajo.
Për këtë situatë është ngritur edhe një grup i posaçëm në Ministrinë e Bujqësisë.
