Partia Socialiste ja del të mbajë kreun e këshillit bashkiak të Himarës. Në mbledhjen e konstituimit të këshillit të ri të dalë nga lokalet e 14 Majit (që është në zhvillim deri në publikimin e këtij artikulli), Dhimitër Kapaj i PS mori 13 vota duke u rikonfirmuar kryetar.
Kapaj ishte në garë me Afrovita Dhimojani nga koalicioni Bashkë Fitojmë, që grumbulloi 8 vota.
Në zgjedhjet e 14 Majit, Partia Socialiste mori 9 këshilltarë, 7 “Bashkë Fitojmë” dhe nga 1 PSD, PD e vulës, LZHK, BD dhe MEGA.
Dhimitër Kapaj njihet si i afërm i ish-kryetarit socialist Jorgo Gorgo, madje familjarë të tij kanë përfituar projekte publike nga Bashkia e Himarës. Boldnews ka raportuar me herët se si kompania e motrës së Kapaj ka fituar një tender për marrjen me qira të 10 hektarëve pyll publik në zonën e Gjomollës, në një procedurë të dyshimtë.
Mbledhja e sotme, ashtu sikurse pritej ka nisur me debate dhe pakënaqësi mes përkrahësve të Fredi Belerit dhe anëtarëve socialistë të këshillit si dhe punonjësve të bashkisë. Mes këtyre debateve, anëtarët e këshillit kanë nisur procedurën e betimit, ndërsa mbetet ende e paqartë se si do të procedohet me betimin e kryetarit të dalë nga lokalet e 14 Majit Fredi Beleri, të cilit iu refuzua dje leja nga GJKKO për të qenë pjesë e mbledhjes së sotme.
Një prej këshilltarëve lexoi gjatë mbledhjes letrën në të cilën Beleri u drejtohet këshillit, ku akuzon kryeministrin Edi Rama për mbajtjen e tij në qeli dhe i bën apel ndërkombëtarëve të reagojnë.
Ambasadorja e Greqisë ishte e pranishme në seancë, bashkë me familjarë të Belerit.
I pranishëm ishte edhe Blendi Klosi, drejtuesi politik i PS-së për qarkun e Vlorës.
Lexo edhe:
Përplasje në Himarë/ Këshilltarët e “BF” braktisin mbledhjen e këshillit
