Një krim i rëndë raportohet të ketë ndodhur në fshatin Madanaj të Gjakovës, mbrëmjen e kësaj të Diele.
Mësohet se në rrethana ende të paqarta janë vrarë dy vëllezër, të identifikuar si Haxhi dhe Blerim Islamaj.
Lajmin për mediat e ka konfirmuar zëdhënësi i Policisë për rajonin e Gjakovës, Lumni Graishta, i cili shprehet se njëri nga vëllezërit ka ndërruar jetë në vend, ndërsa tjetri rrugës për në spital.
“Bëhet fjalë për vrasjen e dy personave, vëllezër. Njëri ka vdekur në vendin e ngjarjes, e tjetri rrugës për spital. Dyshohet të jenë qëlluar me armë zjarri. Për momentin s’kemi informata të tjera, deri më tani nuk ka të arrestuar. Ngjarja ka ndodhur rreth orës 20:00”, tha Graishta.
Burimet paraprake bëjnë me dije se personi i dyshuar për vrasjen e dy vëllezërve është Gjon Gjokaj, i cili ndodhet në arrati.
Motivi i kësaj ngjarje tragjike dyshohet se lidhet me pronën.
Ndërkohë, policia ndodhet në vendin e ngjarjes dhe po punon për zbardhjen e plotë të rastit.
