Përveç Safet Gjicit, GJKKO ka miratuar masa sigurie edhe për persona të tjerë pas publikimit të video-skandalit në zyrën e ish-kryebashkiakut të Kukësit.
Një ndër to është Alma K., gruaja e cila shfaqet në video.
Safet Gjici dhe Alma K. u ndaluan këtë pasdite, ekzaktësisht 8 ditë pas publikimit të një videoje intime, ku të dy shfaqen duke kryer marrëdhënie seksuale në zyrën e ish-kryebashkiakut të Kukësit. Më pas, në media u publikuan të tjera pamje që tregonin se si Gjici i premtoi vajzës në fjalë një projekt për firmën e saj nga Bashkia Kukës.
Mësohet se arrestimi dhe akuza e ngritur nga SPAK për korrupsion pasiv ndaj Gjicit lidhen me këtë ngjarje. Ndërsa Alma K. është ndaluar në Shkodër për korrupsion aktiv. Ndaj gruas, e cila filmoi dhe skenat, është caktuar masa e arrestit shtëpiak nga Gjykata e Posaçme.
Lidhur me çështjen, sipas të dhënave paraprake ende të pakonfirmuara zyrtarisht, GJKKO ka dhënë të tjera masa sigurie ndaj personave të tretë, të cilët dyshohet se kanë shantazhuar ish-kryebashkiakun e Kukësit Safet Gjici me publikimin e video-skandalit. Ende nuk është e qartë numri total i urdhër-arresteve të kërkuar nga Prokuroria e Posaçme dhe miratuar nga gjykata.
