Rektorja e Universitetit të Shkodrës “Luigj Gurakuqi”, Prof.dr. Suzana Golemi, 59 vjeçe, pas pezullimit nga detyra, është shpallur në kërkim edhe nga policia e Shkodrës.
Ajo u denoncua ditën e djeshme nga emisioni “Stop”, ku shfaqej me video duke marrë shumën prej 150 euro në zyrën e saj nga një student, në këmbim të një note kaluese në provim. Ajo ishte në zyrë bashkë me pedagogen Donalda Laçej, 36 vjeçe, ku kjo e fundit është proceduar penalisht.
Duket se Suzana Golemi është arratisur pas publikimit të pamjeve, nuk ka bërë as edhe një reagim, teksa policia njofton se vijon punën për kapjen e saj. Materialet procedurale i kaluan Prokurorisë, për veprime të mëtejshme.
Ditën e sotme, Ministria e Arsimit, rektoren Suzana Golemi e pezulloi edhe nga detyra me motivacionin “Për shkak të shkeljeve të rënda të ligjit”. Në ushtrimin e funksionit të rektorit, ministrja Kushi caktoi zv. rektoren e këtij universiteti Rajmonda Kçira.
Suzana Golemi u zgjodh rektore e Universitetit të Shkodrës “Luigj Gurakuqi” në vitin 2020. Korrupsioni në Universitetet e Shqipërisë prej vitesh është një fenomen shqetësues.
