Një fushatë mashtrimi nëpërmjet sistemeve kompjuterike, e cila synon persona fizikë dhe juridikë, pa dallime të caktuara, me qëllim marrjen e shumave të ndryshme monetare, ka nisur së fundmi.
Kjo gjë bëhet me dije nga Policia e Shtetit, teksa iu bën thirrje qytetarëve të denoncojnë rastet që lidhen me këtë çështje. Për të rritur besimin, autorët kanë përdorur emrat e drejtuesve të Policisë, teksa iu kërkojnë “viktimave” që të kthejnë përgjigje brenda 24 orësh ndryshe do kenë pasoja ligjore.
Policia ka publikuar edhe dy format e mesazheve që autorët u kanë dërguar qytetarëve për t’i mashtruar. Uniformat blu bëjnë me dije se janë duke hetuar për identifikimin dhe kapjen e autorëve dhe në ditët në vijim do të japë më shumë informacion rreth kësaj fushate mashtrimi.
Njoftimi:
Drejtoria për Hetimin e Krimeve Kibernetike është vënë në dijeni për një fushatë mashtrimi nëpërmjet sistemeve kompjuterike, e cila synon persona fizikë dhe juridikë, pa dallime të caktuara, me qëllim marrjen e shumave të ndryshme monetare.
Drejtoria për Hetimin e Krimeve Kibernetike njofton të gjithë qytetarët, se ka nisur puna policore e menjëhershme, për parandalimin e pasojave, për hetimin e ngjarjes, si dhe për identifikimin dhe kapjen e autorëve.
Për t’i shkuar në ndihmë çdo shtetasi që mund të preket nga kjo fushatë mashtrimi, bashkëlidhur këtij njoftimi do të gjeni formatin në të cilin dërgohet mesazhi i postës elektronike, si dhe dokumentin e rremë që i bashkëngjitet këtij mesazhi.
Policia e Shtetit fton qytetarët që janë prekur nga këto mesazhe të cilat iu kanë shkuar në emër të titullarëve të Policisë së Shtetit, kjo për të rritur besueshmërinë e këtyre mesazheve, të denoncojnë menjëherë në adresën e postës elektronike [email protected], të Drejtorisë për Hetimin e Krimeve Kibernetike, e cila është duke kryer hetime intensive dhe në ditët në vijim do të japë më shumë informacion rreth kësaj fushate mashtrimi.
