Akademiku Artan Fuga ka komentuar sërisht ditën e sotme çështjen për Akademinë e Shkencave dhe qëndrimin e deputetit të PS Petro Koçi lidhur me projektligjin për akademinë.
Ky i fundit në mbledhjen e zhvilluar një ditë më parë në Komisionin e Medias, kërkoi që akademiku Fuga të mos jetë prezent në mbledhjen e radhës.
I ftuar në News 24, akademiku Fuga tha se deputeti Koçi dhe deputeti Ismet Beqiraj po tentojnë të shkelin ligjin dhe se nuk japin asnjë argument në favor të çështjes.
Më tej Fuga shtoi se më shqetësuese në atë mbledhje ishte mendësia që u shfaq, pasi sipas tij, u pa qartë që një deputet po kërkonte t’i heqë të drejtën një akademiku pa gjyq.
“Mua më intereson mendësia përjashtues që u shfaq. Si është e mundur që një deputet kërkon t’i heqë të drejtën pa gjyq një akademiku, lerë pastaj një qytetari. Këta deputetë ndoshta nuk duan që të ketë një ballafaqim, apo ndoshta e quajnë një kohë të humbur diskutimin për atë që ata e kanë vendosur. Pika kulminante arriti dje. Unë pyes, këta dy deputetë, me cilin janë konsultuar për të arritur në ato propozime ligjore që propozojnë, pasi relacioni i tyre nuk ka asnjë gjurmë të konsultimeve. Këtë e kërkon ligji. Unë kam katër muaj që them hajde të diskutojmë në publik, të vij unë në Kuvend të diskutojmë. Në gazetari thuhet që duhen dëgjuar të gjitha palët. Një projektligj kërkon të marrësh një ekspert , duhet të bëhen edhe diskutime krahasuese.
Projektligji i zotit Koçi dhe Beqiraj nuk mund të kalojë, ka disa argumente që nuk i dinë sepse ato nuk janë thelluar. Unë do të propozoj rrugë të tjera alternativa shumë të mira për të përmirësuar rrugën ligjore të Akademisë së Shkencave, për edukimin e rinisë, me dije, me shkencën dhe jo të merret një deputet me mendime të tilla, jo 74-vjeç apo 75-vjeç, është banalizim”, tha ndër të tjera Fuga.
