Pentagoni ka zbuluar një gabim të madh që ka bërë në llogaritje gjatë përgatitjes së ndihmave për Ukrainën, gabim i cili i ka kushtuar plotë 6.2 miliardë dollarë nga taksat e amerikanëve.
Ukraina është duke ngritur një kundërofensivë për të rimarrë pjesë të territorit të saj dhe presidenti ukrainas Volodymyr Zelensky po u kërkon mbështetësve të dërgojnë sa më shumë ndihma, sa më shpejt të jetë e mundur.
Gabimi, i cili u raportua për herë të parë muajin e kaluar me një shumë më të ulët prej rreth 3 miliardë dollarë, ndodhi sepse zyrtarët e Pentagonit llogaritën gabimisht totalin duke përdorur vlerat zëvendësuese për armët, në vend të vlerave të tyre aktuale, tha zëdhënësja e Pentagonit, Sabrina Singh.
Llogaritja përfundimisht u zvogëlua me 2.6 miliardë dollarë në vitin fiskal 2022 dhe 3.6 miliardë dollarë në 2023, tha ajo të martën. Administrata e presidentit Joe Biden ka dërguar më shumë se 40 miliardë dollarë në ndihma për Ukrainën që kur Rusia nisi pushtimin e saj, 16 muaj më parë.
