Vdekja e Silvio Berlusconi do të ketë pasoja në Serinë A. Ashtu siç parashikohej që nga momenti kur u lajmërua ndarja nga jeta e manjatit italian, klubi i Monzës shumë shpejt do të shpallet zyrtarisht në shitje, duke krijuar jo pak telashe në Serinë A.
Blerja e Monzës ishte iniciativë e Berluskonit i cili kërkonte të qëndronte i lidhur me botën e futbollit, edhe pse familjarët e tij ishin gjithmonë kundër.
Me ndarjen nga jeta të tij, fuqia vendimmarrëse u kalon pikërisht atyre dhe sipas “Il Corriere della Sera”, fëmijët e tij kanë vendosur që të shesin klubin pasi duan të dalin përfundimisht nga bota e futbollit.
Ata ia kanë komunikuar vendimin edhe administratorit të deleguar, Adriano Gallianit, i cili tashmë d otë jetë personi që do të merret me procedurat e shitjes së kubit.
Një situatë e pazakontë, pasi do të jetë e vështirë që të gjendet një investitor i rëndësishëm për një kub të vogël si Monza i cili pa fluksin e financimeve të Berluskonit do të ketë shumë të vështirë të përballojë kostot e elitës së futbollit italian dhe rrezikon kolapsin financiar e sportiv.
