Policia ka dalë me një njoftim zyrtar lidhur me një lajm që u publikua ditën e sotme nga mediat, se ka pasur shpërthime në një gurore në fshatin Haliaj të Krujës.
Në njoftimin zyrtar policia deklaron se lajmi është i pavërtetë, pasi gurorja në fjalë është mbyllur që prej muajit janar.
Gjithashtu blutë bëjnë me dije se janë revokuar edhe lejet e shfrytëzimit në zonën e mbrojtur Krastë-Verjon në Krujë.
Njoftimi i Policisë:
Reagim i DVP Tiranë Në lidhje me një lajm të publikuar në media i cili bën fjalë për disa shpërthime në një gurore në fshatin Halilaj, Krujë, ju sqarojmë se: Pas lajmit të publikuar, shërbimet e Policisë kanë ushtruar kontroll të menjëhershëm dhe nga kontrolli i ushtruar ka rezultuar se kjo gurore është e mbyllur që në muajin janar të këtij viti, në kuadër të operacionit policor të koduar “Mjedisi”. Gjithashtu, që në muajin janar në asnjë prej guroreve që u janë revokuar lejet e shfrytëzimit në zonën e mbrojtur Krastë-Verjon në Krujë, nuk ka pasur punime. Drejtoria Vendore e Policisë Tiranë kërkon mirëkuptimin e mediave që para se të publikojnë lajme të kërkojnë informacion pranë DVP Tiranë dhe fton qytetarët që të denoncojnë në 112 çdo rast të paligjshmërisë.
