Dhjetë persona janë arrestuar nga policia e Korçës në kudër të një aksioni anti-drogë. Burime zyrtare nga blutë bëjnë me dije se aksioni vjen në vazhdën e dy operacioneve të koduara “Knock Down” të finalizuar 1 vit më parë, për goditjen e veprimtarive kriminale në fushën e prodhimit dhe shitjes së narkotikëve, armëmbajtjes pa leje dhe kultivimit të bimëve narkotike.
Në kuadër të tyre u proceduan penalisht 43 persona, nga të cilët 10 të ndaluar, 6 të arrestuar në flagrancë, 3 të shpallur në kërkim dhe 24 të tjerë po hetohen në gjendje të lirë.
Më herët, policia ka njoftuar se të dyshuarit vepronin në formën e grupeve të strukturuara kriminale, të cilët siguronin nga rrethet Tiranë, Fier, Durrës dhe Elbasan droga të forta, kokainë e heroinë, si dhe kanabis dhe i shpërndanin në qytetin e Korçës.
Faza 3
Ndërkohë faza e tretë e operacionit erdhi pas një hetimi proaktiv të thelluar 6-mujor, sipas burimeve zyrtare.
Nga Gjykata e Rrethit Gjyqësor Korçë janë lëshuar 13 masa sigurie “Arrest në burg”, nga të cilat strukturat hetimore në bashkëpunim me Forcat e Posaçme “Shqiponja” të DVP Korçë kanë ekzekutuar 10 masa ndalimi: Piro Papapetro 31 vjeç; Petrit Arixhiu 19 vjeç; Bledar Repa 46 vjeç; Taulant Repa 38 vjeç; Ermal Bezhani 36 vjeç; Markelian Kamenica 29 vjeç; Enea Frashëri 26 vjeç; Gentian Koçoli 40 vjeç; Devis Xhaholli 39 vjeç dhe Martin Kosturi 23 vjeç, të gjithë banues në Korçë.
Gjithashtu u shpallën në kërkim: E. K., 32 vjeç; M. D., 22 vjeç; E. N., 23 vjeç, po banues në Korçë.
Gjatë operacionit “Knock Down 3”, janë sekuestruar në cilësinë e provës materiale: 388 gramë kokainë e ndarë në doza; 9 kilogramë kanabis; 1 armë zjarri tip pistoletë dhe municion luftarak; 9 automjete; 28 aparate celular; 6 peshore elektronike; një sasi në lekë dhe në euro, të përfituara nga veprimtaria kriminale; idanë të kultivuar në gota plastike; 2 llamba neon led.
Ndërkohë, hetimet vijojnë.
