Një operacion policor po zhvillohet për arrestimin e pjesëtarëve të një grupi kriminal, mes të cilëve është dhe Sokol Idrizaj, ish-shoferi i Ardi Veliut.
Gjykata e Posaçme, me kërkesë të Prokuroria e Posaçme (SPAK) ka miratuar 18 masa sigurie për disa persona të dyshuar si anëtarë të një grupi kriminal. Mësohet se mes personave të cilët preken nga urdhër-arrestet janë edhe disa punonjës policie.
Ish-shoferi i Ardi Veliut, i cili ka qenë Drejtor i Përgjithshëm i Policisë së Shtetit, e që aktualisht mban postin e kreut të Agjencisë së Mbikëqyrjes Policore, është po ashtu në mesin e të dyshuarve bashkë me bashkëshorten dhe vajzën.
Të dyshuarit akuzohen për veprat penale “pastrim parash”, “ushtrim pa licencë i veprimtarisë bankare”, “kontrabandë me mallra të tjera”, “mos deklarim në kufi i të hollave dhe sendeve me vlerë”, “grup i strukturuar kriminal”, “kryerje veprash nga organizata kriminale”.
Sipas hetimeve, bëjnë me dije burime pranë SPAK, grupi trafikonte sende me vlerë të vjedhura jashtë Shqipërisë, kryesisht bizhuteri, në Francë dhe vende të tjera të Bashkimit Evropian, përmes portit të Durrësit. Po ashtu, sipas hetimeve, fusnin në vend edhe para të padeklaruara te autoritetet.
Operacioni ka nisur që prej orëve të para të mëngjesit të sotëm ndërsa janë sekuestruar para, bizhuteri dhe sende të tjera me vlerë. Policia po ushtron kontrolle në disa banesa dhe në një laborator analizash ku punonte bashkëshortja e ish-shoferit të Ardi Veliut. Operacioni i përbashkët me autoritetet franceze po kryhet në Tiranë, Dibër, Shkodër dhe Lezhë.
