Ka ndërruar jetë në moshën 76-vjeçare Flavia Franzoni, gruaja e ish-kryeministrit italian Romano Prodi.
Njoftimi është bërë i ditur nga zyra e tij për shtyp. Detajet e vdekjes nuk janë bërë ende me dije.
“Me dhimbje të madhe, Presidenti Romano Prodi, së bashku me djemtë e tij Giorgio, Antonio dhe gjithë familjen e tij, njofton se bashkëshortja e tij, Flavia Franzoni, ka ndërruar jetë sot papritmas”, shkruhej në njoftim.
Flavia Franzoni ishte profesoreshë e teknikave për shërbimin social në Fakultetin e Shkencave Politike në Bolonja, ajo punoi si drejtoreshë e institucionit rajonal të shërbimeve për 20 vite me radhë.
Nga ana tjetër, Romano Prodi, ish-kryeministër i Italisë dhe presidenti i Komisioni Europian njëherë në një kohë, njihet si një figurë e dashur për shqiptarët për ndihmën në vitin 1997.
Ai i erdhi në ndihmë vendit tonë me dërgimin e një kontigjenti ndërkombëtar të udhëhequr nga Italia, për t’i dhënë fund luftës civile shqiptare në vitin 1997.
