Drejtuesi i një autobusi të linjës Bari-Durrës është arrestuar në portin e qytetit bregdetar për mosdeklarim të hollash. Sipas policisë, ai kishte fshehur 99 700 euro të ndara në 8 paketime në tavanin e autobusi me qëllim që të mos i deklaronte në hyrje të Republikës së Shqipërisë.
Operacioni i koduar “Entry”, njoftoi këtë të Martë policia, erdhi pas informacioneve të siguruara nga inteligjenca informative.
“Në hyrje të Republikës së Shqipërisë, është kaluar në vijën e dytë, për kontroll më të detajuar, një autobus tip ‘Scania’ i linjës Durrës-Bari-Durrës. Gjatë kontrollit të imtësishëm në autobus, në pjesën e tavanit, janë gjetur 8 paketime me kartëmonedha në euro, gjithsej 99 700 euro, të cilat u sekuestruan në cilësinë e provës materiale”, thuhet në njoftimin e bluve.
Në vijim të veprimeve të para hetimore të kryera nga specialistët për Hetimin e Krimeve Ekonomike dhe Financiare të Drejtorisë Vendore të Policisë Durrës, u bë arrestimi në flagrancë i shtetasit E. Rr., 37 vjeç, banues në Durrës, për veprën penale ‘Mosdeklarimi në kufi i të hollave dhe i sendeve me vlerë’, shtuan të njëjtat burime.
