Vijon thellimi i përccarjen në PD-në e vulës, ku grupi që mbështet Enkelejd Alibeajn, duket se ka nisur eliminimin e zërave kritikë nga funksionet në parti.
Një prej tyre është Saimir Korreshi. Sekretari i Përgjithshëm i partisë Gazment Bardhi, tha se nuk ka asnjë informacion se si është zëvendësuar Saimir Korreshi si kryetar i degës në Lushnje.
“Unë nuk di pse është zëvendësuar njëri apo tjetri, nuk kam firmosur asnjë vendim dhe nuk do firmos asnjë vendim që bie ndesh me statutin. Unë nuk do të jap detaje të zbatimit të statutit. Nuk kam dijeni për një propozim të tillë. Organizimi i PD-së është përgjegjësi e sekretarit të përgjithshëm. Mesa duket një grup kanë vendosur të ushtrojnë kompetencat e sekretarit të Përgjithshëm. Unë do të zbatoj statutin e PD-së. Çdokush tjetër që ka vendosur të ecë përpara në procese anti statutore bën zgjedhjet e tij. Pa statut dhe pa rregulla nuk mund të ketë bashkëjetesë”, u shpreh Bardhi për gazetarët.
Gazment Bardhi dhe deputetë të tjerë demokratë të PD-së së vulës si Saimir Korreshi, Lefter Geshtenja, Bledion Nallbati, Helidon Bushati, etj, kundërshtuan vendimin e marrë nga kryesia e partisë për zhvillimin e zgjedhjeve për kryetar më 29 Korrik.
Me këtë lëvizje, janë shtuar zërat se Lulzim Basha do të rikthehet në krye të partisë.
