Dy fëmijë janë plagosur në Rrogozhinë pasditen e kësaj të Premteje, pasi janë përplasur nga një automjet.
Fëmijët e moshën 10 dhe 11 vjeç janë transportuar në spital, ndërsa drejtuesi i makinës që i përplasi është larguar nga vendngjarja.
“Rreth orës 19:40, në qendër të Rrogozhinës, një mjet tip ‘Ford’, me targë e drejtues ende të paidentifikuar ka aksidentuar dy të mitur 10 dhe 11 vjeç, dhe më pas është larguar nga vendi i ngjarjes”, njoftoi policia.
Si pasojë të miturit janë dëmtuar dhe ndodhen në spital, nën kujdesin e mjekëve, ndërsa grupi hetimor po punon për identifikimin dhe kapjen e drejtuesit të mjetit dhe sqarimin e rrethanave të aksidentit, shtuan të njëjtat burime.
