Dr. Edith Harxhi, eksperte e shkencave politike ka qënë ndër zërat më kritikë sot ndaj propozimit të kryeministrit Edi Rama për Asociacionin e komunave me shumicë serbe në Kosovë.
Në shënimin e saj në Fb, znj. Harxhi, duke analizuar dy momentet më të dukshme të lidhura me ideatorin, “sekretin” në radhë të parë, e konsideroi qasjen e Ramës si një tradhti tjetër ndaj interesave kombëtare, një skandal kombëtar.
“Paraqitja e sotshme e Edi Ramës, si një njeri që nuk i intereson Kosova por vetëm fama e tij mes ndërkombëtarëve, që e ndihmon të rrijë në pushtet për arsye të asaj që anglezët e quajnë “lip service” – pra të thotë çfarë u pëlqen të tjerëve, është një tradhti tjetër ndaj interesave kombëtar, – shkroi Harxhi në Fb.
“Megjithëse ai thotë që drafti për statutin e Asociacionit që ai paska ofruar është sekret, është e kuptueshme që pa dakordësinë e klasës politike në Shqipëri, në Kuvend, në Kosovë dhe të shqiptarëve në Ballkan, ai ka propozuar draft si ai i këmbimit të kufijve që u dizajnua para disa vitesh në Beograd dhe u pranua nga të tre autokratët në Ballkan.
Besoj kjo ka qenë arsyeja e vizitës së Soros junior në Prishtinë, një ditë para plasjes në krizës në Zveçan dhe më pas në Bratislavë, ku siç thotë ai vetë, u takua me “vëllanë e tij që është faktor stabiliteti në Ballkan”.
Ky është një skandal kombëtar që na bën me turp secilin prej nesh dhe me këtë rast u bëj thirrje shqiptarëve në rajon e në diasporë ta shpërfillin dhe dënojnë këtë autokrat që vepron kundër interesave kombëtare dhe që paturpësisht thotë Kosova nuk është e kosovarëve.”
