Mbledhja e kryesisë së Partisë Demokratike së vulës ku u vendos për hapjen e garës së menjëhershme për kryetar mbrëmjen e djeshme është shoqëruar me tensione të shumta, përplasje, dhunë verbalë dhe gati edhe dhunë fizike.
Të parët që kanë braktisur mbledhjen kanë qenë kryetari i grupit parlamentar demokrat, Gazmend Bardhi dhe deputeti Dashnor Sula.
Në daljen e tyre nga ambientet e selisë, mbështetës të Lulzim Bashes i kanë ofenduar.
Më pas Saimir Korreshi, Lefter Geshtenja, Bledion Nallbati dhe Helidon Bushati pasi u larguan nga mbledhja u ndalën në murin e Kryesisë së Kuvendit nga mbështetësit e Bashës që përgjatë gjithë mbledhjes kanë ushtruar presion duke hapur herë pas here derën e sallës ku po mbahej mbledhja dhe kanë lëshuar ofendime ndaj anëtarëve të Kryesisë që janë kundër hapjes së procesit për garën e kryetarit.
Militantet që mbështesin Bashën kanë tentuar që të godasin këta deputetë.
Jashtë ambienteve të kryesisë, mbështetësit e Bashës iu kanë kërkuar llogari deputetëve “rebelë”, duke iu thënë “t’ju vijë turp”, “po na torturoni”, apo kërcënime të tipit “nëse shkoni te Berisha do ta keni pisk punën”.
Mbështetësit e Bashës kanë ushtruar dhunë verbale dhe kanë ofenduar edhe gazetarët që raportonin prej ores 18:00 nga ambientet e jashtme ku mbahej mbledhja e kryesisë.
Kryesia vendosi hapjen e procesit zgjedhor dhe mbajtjen e zgjedhjeve për Kryetarin e PD më datë 29 korrik 2023. Vendimi u miratua me 17 vota pro, 2 vota kundër dhe 3 abstenime.
Deputetët u ndanë në dy grupe.
Grupi i deputetëve, në përbërje të të cilit ishin Gazmend Bardhi, Dashnor Sula, Bledion Nallbati, Helidon Bushati, Jorida Tabaku, Lefter Gështenja dhe Sajmir Koreshi kërkuan zhvillimin e zgjedhjeve së pari nëpër degë e më pas për kryetar. Po kështu, u kërkua nga ata një bashkim e PD.
Ndërsa grupi i dytë që përbëhet nga ish-kryetari i komanduar i partisë, Enkelejd Alibeaj, ish-kandidatët për kryetar bashkie i Tiranës, Roland Bejko, Agron Kapllanaj dhe ish-deputeti Xhemal Gjunkshi mbështetën zhvillimin e zgjedhjeve më 29 korrik.
Pas mbledhjes, Tabaku njoftoi dorëheqjen si nënkryetare.
“Në gjykimin tim veprimet e tilla të njëanshme si në të shkuarën kanë ndikuar në zvogëlimin e PD dhe kanë sjellë në një situatë si kjo e sotmja. Prandaj refuzova të votoj për një vendim që në mendimin tim na dëmton sot për mënyrën se si po merret dhe në kushtet në të cilat po merret! Duke pasur parasysh gjithë situatën, vendosa që të tërhiqem edhe nga pozicioni i nënkryetares së PD”, tha ajo.
Po ashtu, deputetja Oriela Nebiaj dhe Flamur Hoxha kanë dhënë dorëheqjen nga kryesia dhe funsionet në parti.
Ndëkkohë, Gament Bardhi, përmes një postimi në rrjetet sociale këtë të Martë, dënoi dhunën nga mbështetësit e Lulzim Bashës.
“Dhuna verbale, presioni dhe shantazhi kundër deputetëve të PD që mendojnë ndryshe nuk janë mjete politike. Kjo sjellje prej grupimi paramilitar hedh në erë bashkëjetesën brenda kësaj force politike dhe dërrmon në mënyrë përfundimtare besimin e qytetarëve tek PD. Duke dënuar me forcë aktet e dhunës kundër deputetëve të PD, anëtarëve të Kryesisë dhe gazetarëve, u kërkoj secilit kolegë të distancohen publikisht prej tyre. Përmes dhunës, presionit dhe shantazhit nuk ndërtohet asgjë afatgjatë, në interes të demokratëve dhe të Shqipërisë”, shkroi ai.
VOTUAN PRO zgjedhjes së kryetarit të ri më 29 Korrik
1.Enkelejd Alibeaj
2.Flutura Açka
3.Jemin Gjana
4.Taulant Zeneli
5.Endri Hasa
6.Indrit Sefa
7.Kreshnik Çollaku
8.Roland Bejko
9.Gentian Gaba
10.Agron Kapllanaj
11.Arbi Agalliu
12.Fitim Zekthi
13.Gazmend Koduzi
14.Merita Bakiu
15.Orjola Pampuri
16.Taulanda Jupi
17.Xhemal Gjunkshi
KUNDER
1.Jonila Godole
2.Flamur Hoxha
ABSTENIM
Jorida Tabaku, Juela Hamati dhe Oriela Nebiaj
REFUZUAN VOTIMIN
1.Gazmend Bardhi
2.Dashnor Sula
3.Saimir Korreshi
4.Helidon Bushati
5.Bledion Nallbati
6.Dhurata Çupi
7.Lefter Geshtenja.
