Një ndërtues është mes 10 personave ndaj të cilëve është lëshuar urdhër-arrest lidhur me hetimet që çuan në pranga ish-kryebashkiakun e Durrësit Vangjush Dako.
Ai është Fiqiri Farruku, ndërtuesi i pallatit që u shemb nga tërmeti i 2019-ës, ku sipas hetimeve të SPAK, u ndërtua pa leje.
Ndaj tij, si dhe ndaj inxhinieres së firmës që Faruku zotëron – “FAKLE SH.P.K” – është lëshuar masa e sigurisë së arrestit me burg.
E njëjta masë është lëshuar dhe për Vangjush Dakon dhe 4 ish-zyrtarë të Bashkisë së Durrësit.
Ndërsa për tre prej tyre, është dhënë në mungesë masa e arrestit shtëpiak.
Një aksion policor po zhvillohet këtë të Martë për ekzekutimin e masave.
