KAS miraton rezultatin për kryetar të bashkisë së Rrogozhinës pas rinumërimit të votave.
Diferenca mes kandidatëve pas rinumërimit është 21 vota më shumë për kandidatin e PS-së, Edison Memolla.
KAS ka rrëzuar kërkesën e koalicionit “Bashkë Fitojmë” për të mos përfshirë në tabelën përmbledhëse të rezultateve kutinë e burgut të Rrogozhinës që shpalli fitues kandidatin e Partisë Socialiste.
Ndërkohë në krahun tjetër kandidati i koalicionit “Bashkë Fitojmë” për Rrogozhinën tha se vendimin e KAS do të çojë në Kolegjin Zgjedhor.
Raportohet se kutia e fundit që u numërua në Rrogozhinë ishte ajo e burgut. Nga këto 92 vota shkuan për kandidatin e Partisë Socialiste, Edison Memolla dhe vetëm 12 vota shkuan për kandidatin e koalicionit “Bashkë Fitojmë”.
Kryetari i Partisë Demokratike Sali Berisha ka denoncuar manipulimin e rezultatit zgjedhor në Bashkinë e Rrogozhinës, në favor të kandidatit të PS-së Edison Memolla, nga ana e Drejtorit të Burgjeve, Admir Abria.
Sipas Berishës, janë sjellë të burgosur nga burgjet e tjera për të votuar kundër kandidatit të koalicionit ‘Bashkë Fitojmë’, Shkëlqim Hoxha.
