Një 46-vjeçare, punonjëse në postën private “Adex”, është arrestuar nga policia e Korçës pasi akuzohet për vjedhjen e rreth 3 mln eurove. Ajo dyshohet se ka përdorur një skemë për vjedhjen e bizneseve që bashkëpunonin me postën ku ishte punësuar, si dhe vetë punëdhënësin.
Burime zyrtare nga blutë konfirmuan se Alma Beqiri, 46 vjeçe, banuese në Korçë u arrestua në aksionin e koduar “Postmail” nga policia dhe prokuroria e Korçës pas hetimeve 2 mujore.
3 mln euro vjedhje
Nga hetimet rezulton se Beqiri, gjatë periudhës 2021-2023, në të cilën ushtronte funksionin e agjentes së shërbimeve postare private në Korçë dhe Pogradec, dyshohet se nëpërmjet mashtrimit, ka përvetësuar shumën 3 000 000 euro.
“46-vjeçarja, me detyrë agjente e shërbimeve postare private, shpërndante pako të ndryshme postare, për llogari të subjekteve të treta dhe shumat monetare që i arkëtonte nga klientët, nuk i ka derdhur në llogarinë e subjekteve tregtare shitëse dhe as tek kompania që kryente këtë shërbim”, njofton policia.
Investime në prona private
Sipas të njëjtave burime, shumën e konsiderueshme të përfituar, Beqiri dyshohet se e ka investuar në blerjen e pasurive të paluajtshme dhe të bizneseve tregtare në emër të vet dhe të familjarëve të saj.
Në cilësinë e provës materiale u sekuestruan 2 automjete, në përdorim nga 46-vjeçarja, ndërsa vijon puna për identifikimin dhe vënien përpara përgjegjësisë ligjore të shtetasve të tjerë, të dyshuar të implikuar në këtë skemë mashtrimi, njofton policia.
Nga një kërkim në Qendrën Kombëtare të Biznesit, rezulton se 46-vjeçareja është pronare e dy bizneseve me statusin aktiv. I pari është i regjistruar si “Person Fizik” në 20/04/2021 me vendndodhje në Korçë dhe veprimtari shitje me shumicë dhe pakicë artikuj të ndryshëm, ushqimorë dhe industrialë. I dyti është regjistruar më 09/12/2022 si SHPK me vendndodhje në Tiranë dhe ka si veprimtari “, tregtimi me shumicë dhe pakicë i mallrave të ndryshëm industrial etj”.
Në një reagim pas arrestimit të Beqirit, kompania ku ajo ishte e punësuar deklaroi se “u ka kërkuar institucioneve ligjzbatuese të thellojnë hetimin e tyre në provimin e çdo bashkëpunëtori në krim si dhe në rikuperimin e çdo shumë të vjedhur kompanisë’.
