Një makinë është përplasur në portat e Downing Street në Londër, rezidenca zyrtare e kryeministrit të Mbretërisë së Bashkuar. Lajmi është bërë i ditur nga mediat vendase që raportojnë se një person është arrestuar, teksa nuk dihet nëse ka të lënduar.
Trafiku është bllokuar dhe zona përreth e Whitehall, ku ndodhen zyrat e qeverisë, është rrethuar nga efektivët. Një kalimtar ka filmuar skenën me smartfonin e tij, e ndërsa nga sa raportojnë mediat britanike Kryeministri Rishi Sunak ishte në Downing Street në momentin e përplasjes.
Oficerët e armatosur që ruanin hyrjen e rezidencës së kryeministrit britanik arrestuan drejtuesin e makinës.
“Rreth orës 16:20 një makinë u përplas me portat e Downing Street në Whitehall. Oficerët e armatosur arrestuan një burrë në vendngjarje nën dyshimin për dëmtim kriminal dhe drejtim të rrezikshëm. Nuk raportohet për të lënduar. Hetimet janë në vazhdim”, tha policia në një deklaratë.
