Benet Beci arriti për herë të parë që nga viti 1991 që duke përfaqësuar siglën e Partisë Socialiste të mposhtë demokratët në këtë bashki, duke fituar me afro 12 mijë vota diferencë përballë rivalit të tij nga koalicioni “Bashkë Fitojmë”, Bardh Spahia.
Thyerja e bastionit historik të PD entuziazmoi edhe vetë Edi Ramën, i cili reagimin e vetëm pas përfundimit të procesit të numërimit në pjesën më të madhe të bashkive e pati për Shkodrën.
Ndërkohë, vetë Benet Beci ka reaguar për herë të parë që pas zyrtarizimit të tij si kryetar i ri i Bashkisë së Shkodrës.
“Mirënjohës ndaj secilit prej jush, për qytetarinë, seriozitetin e përkushtimin! Faleminderit nga zemra!”, ishte reagimi i shkurtër i Becit në Facebook.
Më herët, ishte kandidati i “Bashkë Fitojmë” për Bashkinë e Shkodrës, Bardh Spahia, i cili reagoi pasi humbi zyrtarisht garën për drejtimin e qytetit për katër vitet e ardhshme, me një diferencë prej mbi 10 mijë votash me kandidatin socialist, Benet Beci.
“Çdo pushtet i dalë nga bota e krimit dhe paratë e pista nuk jeton gjatë, ndërsa shpirti i lirë i Shkodrës i ka rezistuar edhe kohëve më të errëta. Mirënjohje për të gjithë qëndrestarët dhe ata që nuk bëjnë kompromis për lirinë”, tha Spahia përmes një postimi në Facebook.
Sipas shifrave zyrtare të Komisionit Qendror të Zgjedhjeve, Beci grumbulloi gati 35.000 vota, ndërsa Spahia mbi 22.500 vota.
