Vendosja e masës së sigurisë “arrest me burg” për Fredi Belerin, i cili do të jetë i pari kandidat në Shqipëri që i paraqitet si alternativë qytetarëve në fletën e votimit teksa ndodhet pas hekurave, është cilësuar “akt stalinist” nga kryedemokrati Sali Berisha.
Në një reagim në Facebook, Berisha shprehet se kandidati i koalicionit “Bashkë Fitojmë” për bashkinë e Himarës po mbahet në burg me urdhër të kryeministrit Edi rama.
Sipas tij, Rama ka urdhëruar ndalimin e Belerit për të siguruar kështu vazhdimin e kontrollit të tij mafioz mbi pronat e himariotëve.
“Akt stalinist i Edi Ramës. Ai, për interesa të tij mafioze, urdhëron mbajtjen në burg të kandidatit të koalicionit “Bashkë Fitojmë” të rrëmbyer në mesnatë nga narkopolicia, Fredi Bejleri për të siguruar kështu vazhdimin e kontrollit të tij mafioz, të plotë mbi trojet dhe tokat e banorëve të Himarës”, shprehet Berisha.
Më tej, lideri i opozitës i bën thirrje banorëve të Himarës që t’i drejtohen masivisht kutive të votimit ditën e nesërme dhe të mbrojnë pronat e tyre nga Edi Rama dhe banda e tij në bashki.
“Duke dënuar me forcën më të madhe këtë akt të shëmtuar policesk, ju bëj thirrje banorëve të Bashkisë Himarë, të dalin të gjithë në votime dhe të votojnë për mbrojtjen e pronave të tyre nga Edi Rama dhe banda e tij në bashkinë e Himarës”, nënvizon ai.
