Athina zyrtare paralajmëron se arrestimi dhe mbajtja në burg e Fredi Belerit do të ndikojë në rrugën europiane të Shqipërisë.
Këtë të shtunë, gjykata e Vlorës caktoi masën e sigurisë së arrestit me burg për Belerin, përfaqësuesi i minoritetit grek në vend, i cili garon për kryebashkiak të Himarës, në zgjedhjet lokale të së dielës.
Athina zyrtare shprehet se vendimi i sotëm i gjykatës së Vlorës, “nëse provat nuk janë të pakundërshtueshme, është skandaloz”.
“Arrestimi i një kandidati për Kryetar Bashkie dy ditë para zgjedhjeve nuk përbën shtet ligjor. Vendimi për ndalimin e kandidatit për Kryetar Bashkie sjell një ndryshim të plotë të rregullave të barazisë në zgjedhjet bashkiake në Himarë, qendra më e rëndësishme e pakicës kombëtare greke në Shqipëri”, thuhet në një reagim të ministrisë së Jashtme të Greqisë.
“Një vendim i tillë do të ndikojë edhe në marrëdhëniet e Bashkimit Europian me Shqipërinë, pasi kusht i kësaj rruge europiane është respektimi i rregullave europiane dhe parimeve të shtetit të së drejtës nga vendet kandidate. Vendime si ky i sotmi që shkelin parimet e mësipërme do të thotë se në praktikë Shqipëria nuk po ndjek rrugën europiane”, thuhet më tej në reagim.
Ndërkohë, mëngjesin e sotëm, zëvendësministri i Jashtëm grek Kostas Alatzas tha për një media vendase se: “Ne ua kemi bërë të qartë autoriteteve shqiptare prej kohësh dhe e kemi vënë edhe në Kuadrin e Negociatave të Bashkimit Evropian se mbrojtja e të drejtave të pakicave është ajo që duhet t’i shërbejë Shqipëria, për të ecur përpara në Evropë“.
“Për të pranuar Shqipërinë si vend kandidat për anëtarësim, në Kuadrin Europian të Negociatave u përfshinë qartë dhe në mënyrë eksplicite vetë çështjet lidhur me respektimin e të drejtave të pakicave. Çdo cedim do të shkaktojë një ndryshim edhe në qëndrimin tonë”, shtoi.
I pyetur për arrestimin e Belerit, ai e cilësoi si jashtëzakonisht problematik faktin që një “figurë kryesore e minoritetit grek” përballet me akuza të tilla.
