Dy ditë nga zgjedhjet dhe me situatën e tensionuar pas arrestimit të kandidatit të koalicionit “Bashkë Fitojmë” në Himarë, Fredi Beleri, në të 61 bashkitë e vendit vijon ende procesi i shpërndarjes së materialeve zgjedhore.
Së fundmi kanë mbërritur edhe në KZAZ e Elbasanit të gjithë materialet e nevojshme për votimin e 14 majit 2023 dhe pas magazinimit do të shpërndahen nëpër KQV gjatë ditës së shtunë, ndërsa pajisjet elektronike do ti shpërndajë KQZ-ja.
Në Bashkinë e Elbasanit në këto zgjedhje do të mund të votojnë 170 mijë votues në 224 qendra votimi.
Aktualisht bëhet me dije se janë marrë të gjitha masat e nevojshme që nëse votimi elektronik nuk do të funksionojë atëherë paraprakisht do të njoftohet KQZ dhe më pas çdo gjë do të bëhet në mënyrë manuale, me lista fizike.
Elbasani, Kamza dhe Vora do të jenë tre bashkitë e para në vend ku do të aplikohet për herë të parë votimi dhe numërimi elektronik.
