Emigrimi ilegal drejt Britanisë së Madhe ku zgjodhën të shkonin për t’u punësuar në sektorin e ndërtimit, nuk ka shkuar siç duhet për dy të rinj shqiptarë, të cilët pasi u kapën brenda një “shtëpie bari”, u dënuan me 3 vite burg në total.
Mediat angleze raportojnë se shqiptarët Emiljan Cani dhe Ervis Qerimaj, pasi u gjetën duke kultivuar kanabis me vlerë 470.000 paund, në një banesë në Clacton më 15 dhjetor të vitit të shkuar, janë dënuar nga një gjykatë angleze.
Gjyqtarja Mary Loram që kishte nën shqyrtim dosjen e tyre refuzoi të besonte argumentet e palës mbrojtëse të dy shqiptarëve.
“Më është thënë se ju kanë dhënë ushqim dhe udhëzime dhe se nuk e kishit shumë idenë se çfarë po ndodhte. Nuk e pranoj pjesën e fundit. Ishit në një shtëpi të rrethuar nga droga. Sigurisht që e dinit se çfarë po ndodhte”, u tha ajo Canit dhe Qerimajt, duke i dënuar respektivisht me dy vjet burg dhe me 16 muaj burg.
Cani, 26 vjeç dhe Qerimaj, 37 vjeç, u arrestuan pas një ndjekjeje të shkurtër në këmbë, pasi u pikasën nga oficerët duke dalë nga dera e përparme e një banese në Beach Road, ku policët gjetën çantën e përdorur për të transportuar kanabis dhe një vrimë në mur që i lidhte me banesën ngjitur me të tyren që ishte shndërruar në shtëpi bari.
Evelyn Hicks, avokatja mbrojtëse për të dy të pandehurit, tha se atyre iu premtua një punë në industrinë e ndërtimit për të shlyer borxhin e ardhjes nga Shqipëria në Angli. Por sipas saj më pas u detyruan që të punonin në shtëpinë e barit pasi Cani i detyrohej trafikantëve 22,000 euro dhe Qerimaj 20,000 £.
Hicks shtoi se Cani fillimisht u dërgua në Liverpool, por u burgos edhe atje gjatë një operacioni droge.
Pas lirimit të tij, ai u kontaktua sërish nga njerëzit që u kishte borxh dhe rinisi sërish punën.
“Atij i çonin ushqim tek dera dhe e lanë që të ujiste bimët. Për çdo gjë e udhëzonin me telefon. Roli i tij ishte thjesht të ujitte bimët dhe asgjë më shumë”, tha avokatja mbrojtëse.
