Banorët e fshatit Lumas në bashkinë e Kuçovës kanë kapur mbrëmjen e sotme fadroma nënkontraktore të firmës ‘Salillari’ duke hedhur çakull në hyrje të fshatit.
Menjëherë banorët kanë bllokuar makinerinë e firmës, ndërkohë që shoferi ka lënë mjetin në rrugë dhe ka ikur me vrap. Banorët kanë bllokuar rrugën prej dy orësh dhe kanë njoftuar policinë.
Ndërkohë ata i kanë kërkuar policisë edhe arrestimin pronarit të firmës që do shtronte çakullin elektorale, Fredi Marra. Banorët pohojnë se firma fantazmë u kap duke shqyer rrugën,për të hedhur më pas çakullin që ishte ngarkuar në një tjetër kamion të firmës.
Banorët pohojnë se askush nuk mund t’ju hedhi “hi syve” dhe të tallet me ta duke ju hedhur çakull elektoral 7 ditë para zgjedhjeve. Banorët i bëjnë thirrje instancave më të larta, që të marrin masa për këtë masakër elektorale që po ndodh në fshatin Lumas, me qëllim blerjen e votës.
Banorët deklarojnë se nëse policia nuk do të marri asnjë masë, ata do të djegin makinat e firmës.
Sapo morëm vesh që erdhën këto fadromat për të shtruar këtë rrugë gjoja, prej katër vitesh kjo rrugë nuk u shtrua. Tani kërkojnë para votimeve të bëjnë një copë rrugë, pa leje. NË vend që të ndëshkohen ata që ndërtojnë pa leje, ministri bëhet palë me ta. Për të krijuar opinionin e bukur gjoja të PS që “ja ne punojmë”. Na bëjnë për qorr, nuk jemi më popull i viteve 90. Është tjetër popull sot. Vetëm gërmo e shesho. Ne do ta pezullojmë këtë, po të ishin të aftë ta kishin bërë.
Më vjen keq shumë, faktet flasin vetë, si ka mundësi Ministri vete shkel ligjin. ne vërtet kemi nevojë për rrugë, këtu pushtetin e ka pasur gjithnjë e majta, pse nuk e bënë më parë. Kështu do bëhet rruga shkel e shko, se e bëjnë vetëm për të marrë vota. Këtu ka një gjë, Prokuroria nuk funksionon. Unë i kam dërguar disa letra SPAK-ut dhe rrinë atje. U bëj thirrje prokurorëve. Ku i gjen këto para ky, vetëm për të vjedhur vota, sepse kjo vjedhje është.
Jemi mbledhur këtu, për një shqetësim që na njoftuan, se po bëjnë rrugë. Ne u gëzuam, kur shikojmë ata po e prishnin. Po bëjmë 32 vite që Kuçovën e ka e majta. Populli i Kuçovës ka marrë fund. Të vijë policia të heqë ça janë, se do ta bëjmë copë-copë. Po bëjmë dy vjet e gjysme, ai Çuçi që ka mjekrën si cjap, të vijë këtu ta provojë kush jemi ne,”-bënë me dije banorët, në një prononcim për Syri TV.
Ndërkohë lidhur me rastin ka reaguar dhe kandidati i Koalicionit Bashkë Fitojmë për Bashkinë e Kuçovës, Lefter Maliqi.
Përmes një postimi në rrjete sociale Maliqi ka postuar videon nga vendngjarja, krahas së cilit shkruan: ‘Pellumb Ajdari me firma kontraktore shtron rruge per pengun e tij Kreshnik Salillari.’
Postimi i plotë i Maliqit:
Skandal cakull elektoral në Lumas.Pellumb Ajdari me firma kontraktore shtron rruge per pengun e tij Kreshnik Salillari.Bravo banorëve te Lumasit per guximin.Stop çakullit elektoral ,stop presioneve,stop blerjes së votave.E drejta do triumfoj.Kuçova do kthehet në kantier ndertimi
