Infermierët dhe mjeku kujdestar në Qendrën Kryesore Familjare në Deçan(QKMF) kanë kaluar disa momente terrori me një pacient i cili posedonte brisk dhe marihuanë. Në një moment ai u bë agresiv pasi nuk bindej që të mjekohej dhe as nuk largohej nga QKMF-ja.
Pacienti kishte shkuar për të kërkuar ndihmë mjekësore me ankesën dhimbje barku, por për një moment kishte refuzuar të merrte terapinë të cilën ia kishte përshkruar mjeku.
Pacienti për një orë kishte qëndruar në hapësirat e QKMF-së por duke refuzuar të merrte terapinë, ndërkohë më pas është bërë agresiv duke bërtitur dhe më pas ka nxjerrë edhe briskun. Menjëherë më pas infermierët kanë lajmëruar policinë.
“Është arrestuar i dyshuari mashkull kosovar pasi që i njëjti pasi kishte shkuar për të kërkuar ndihmë mjekësore në QKMF në Deçan, sipas informatave nga personeli mjekësor, i njëjti kishte paraqitje agresive. Njësitet policore gjatë kontrollit tek i njëjti kanë gjetur e konfiskuar 5.4 gramë substancë narkotike e llojit marihuanë dhe një brisk. Në konsultim me prokurorin, i dyshuari pas intervistimit është liruar në procedurë të rregullt”, njofton policia.
