Kryebashkiaku Erion Veliaj, ka folur për raportin që ka me kryeministrin Edi Ramën, me të cilin shpesh herë është përfolur për përplasje të vazhdueshme.
“Ka 20 vite që nuk ka ditë që unë nuk kam komunikuar me Edi Ramën. Edhe nëse kemi qenë në udhëtime, edhe në mazhorancë, edhe në opozitë. Unë argëtohem aq shumë me këto. Jemi aq rehat në komunikimin tonë, kemi konfidenca”.
Më tej i ftuar në emisionin ‘Top Story’ në Top Channel, Veliaj ka vijuar “furçat” duke u shprehur se është bekim të bashkëpunosh me Ramën.
“E quaj bekim që kam kryeministrin që ka qenë kryetar bashkie, që i di hallet e qytetit. Kemi një simbiozë, kemi një energji dhe një kimi”, shtoi ai.
Rama, thotë kryebashkiaku socialist që garon për një mandat të tretë, është vëllai që s’kam pasur kurrë.
“Unë e shoh veten si një bashkëpunëtor besnik me të cilët kemi ndarë ditë të vështira, edhe kur kemi humbur. E konsideroj një vëlla të madh që s’e kam pasur. Sot jam kandidat, Edin e vlerësoj kryeministrin më të mirë që ka pasur Shqipëria në demokraci. Për të do të flitet në libra” tha Veliaj.
