Tirana është shpallur kampione e vendit për edicionin 2022/23 në basketboll për meshkuj.
Bardheblutë kanë arritur të fitojnë finalen e 5-të ndaj Besëlidhjes me rezultatin final 89-64 duke siguruar kështu titullin numër 21 kampion.
Një triumf me përmbysje për kryeqytetasit, të cilët e nisën serinë e ndeshjeve me 2 humbje por në fund ishin ata që ngritën lart trofeun.
Në periodën e parë të kësaj ndeshje, sfida ishte e barabartë dhe kjo ishte arsyeja pse ajo u mbyll me shifrat 21-21. Bardheblutë më pas filluan që të bënin diferencën në periodën e dytë, duke e mbyllur pjesën e parë të ndeshjes me avantazhin 41-38.
Në periodën e tretë, bardheblutë ia dolën që të shkëputeshin falë pasaktësisë para koshit të skuadrës së Besëlidhjes ku vetëm Bernard ishte rezultativ teksa mbylli ndeshjen me 35 pikë.
Nëse bardheblutë realizuan 25 pikë, skuadra lezhjane shënoi vetëm 13 pikë në këtë periodë. Kryeqytetasit vazhduan të ishin më të saktë poshtë koshit dhe me kundërzbritjet e tyre edhe në periodën e katërt duke bërë të qartë fatin e kësaj finaleje të pestë duke e mbyllur takimin me rezultatin e thellë 89-64.
“MVP” i finaleve është shpallur Julian Hamati.
Ndërkohë për tu përmendur është fakti që takimi është zhvilluar në një klimë tensioni teksa në një moment takimi u ndërpre. Tifozët lezhjanë dalin jashtë kontrollit duke goditur me sende të forta në drejtim të stolit bardheblu duke u bërë e nevojshme ndërhyrja e forcave të rendit për të vendosur qetësinë dhe për të vijuar sfidën, pasi basketbollistët e Tiranës kishin shkuar në dhomat e zhveshjeve.
Gjithsesi në fund gjithçka u mbyll në festë, me lojtarët e Tiranës që ngritën trofeun.
