Një 49-vjeçar shqiptar, Aleks B., rrezikon të dënohet me 6 vite burg pasi akuzohet se trafikonte klandestinë drejt Britanisë së Madhe.
Nga hetimet rezulton se shqiptari me banim në Anderlecht, ka trafikuar 19 persona. Më 18 shtator 2020 dhe 22 janar 2021, përkatësisht katër dhe gjashtë shqiptarë u gjetën në një rimorkio në portin e Zeebrugge. Nga këqyrja e celularëve të tyre u zbulua se ata ishin në kontakt me Aleks B., 49-vjeçarin shqiptar, i cili prej 21 vitesh jeton në Anderlecht pa dokumente qëndrimi.
Ai u prangos në shtëpinë e tij në muajin gusht 2021 dhe pavarësisht se ka trafikuar 19 persona, gjykata e shkallës së parë ka konstatuar vetëm faktet e 18 shtatorit 2020 për katër persona dhe e ka dënuar me 15 muaj burg dhe 32 mijë euro gjobë.
Por, Prokuroria publike apeloi pasi shqiptari nuk ka “zënë mend” nga e kaluara sepse Aleks B. rezulton se ka qenë i dënuar me dy vite burg për trafikim të qenieve njerëzore në vitin 2014.
Mësohet se prokuroria ka gjetur edhe rastet e tjera të kontrabandës të vërtetuara në bazë të hetimeve telefonike, ndaj edhe kërkoi 6 vjet burg dhe 152 mijë euro gjobë.
“Ai është thellësisht i përfshirë në mjedisin kriminal dhe kjo tregon një qëndrim të rrezikshëm”, konstatuan prokurorët.
Hetuesit kanë gjetur edhe rastet e tjera të kontrabandës të vërtetuara në bazë të hetimeve telefonike, por shqiptari i ka mohuar këto fakte.
Ai tha se i njihte personalisht viktimat që kishin kontakte me të. “Ka të bëjë me të njohurit, miqtë ose familjen e tij”.
