Një ngjarje e rëndë ka ndodhur rreth orës 08:00 të mëngjesit të sotëm, në një shkollë në kryeqytetitn e Serbisë, Beograd.
Një nxënës 14-vjeçar me inicialet K.K, ka hapur zjarr brenda shkollës fillore “Vladislav Ribnikar” në Vraçar, duke vrarë një roje sigurie dhe 8 fëmijë, ndërsa ka mbetur i plagosur mësuesi i historisë dhe shumë të tjerë.
Me armën e të atit në dorë dhe një kapuç të zi në kokë, adoleshenti po ecte i qetë sikur të mos kishte ndodhur asgjë, kur kreu masakrën.
Në hyrje është ndaluar nga një roje sigurie me të cilin ka debatuar dhe ka nisur ta sulmojë, duke shënuar edhe viktimën e parë.
Sulmi më pas ka vijuar brenda një klase, ku djali ka nxjerrë armën dhe ka filluar të qëllojë pa ndalim.
Ndërkohë, raportohet se tre prej nxënësve janë transferuar në Tirsovë, ku njëri prej tyre është në rrezik për jetën dhe ka hyrë në sallë të operacionit me lëndime në kokë, ndërsa dy të tjerë janë në terapi intensive.
Policia ka bërë të ditur se i mituri është arrestuar edhe pse u largua nga vendi i ngjarjes pas të shtënave.
Sipas informacioneve jozyrtare më shumë se dhjetë fëmijë të plagosur janë transportuar në spital.
Një nga prindërit i tha N1 se vajza e tij doli me vrap nga klasa gjatë të shtënave dhe se agresori ishte shoku i saj i shkollës.
“Vajza ime ishte pikërisht në atë klasë, ajo ishte në klasë ku djali qëlloi të shtënat e para në drejtim të mësuesit dhe më pas filloi të qëllonte mbi fëmijët që ishin nën tavolina dhe fëmija im vrapoi jashtë”, rrëfeu ai.
“Filloi të qëllonte rastësisht, kishte dy armë në dorë, fillimisht qëlloi mësuesin e historisë dhe më pas vazhdoi. Ai vrau dy shokët tanë, unë u shtriva sipër tyre që të mendonte se kam vdekur. Ai u largua, por në klasë, ende dëgjoheshin të shtëna”, raportojnë mediat serbe, duke iu referuar deklaratës së njërës prej vajzave që i mbijetuan të shtënave.
Sa i përket autorit, sipas nova.rs nxënësi Kosta K. ka qenë nxenës shembullor dhe ka marrë pjesë në shumë gara shkollore, më e rëndësishmja ajo e matematikës, ku mori edhe vlerësime.
Vitin e kaluar, Kosta fitoi edhe vendin e tretë në garën e historisë komunale. E gjithë ngjarja dyshohet se ka lidhje me inatin e tij ndaj mësuesit të historisë, klasën e së cilit ai e rrafshoi me breshëri arme.
