Familjarët e Ardian Nikulajt i kanë falur gjakun të afërmeve të Edmond Haxhisë, i cili dyshohet se është organizatori, financuesi dhe porositësi i vrasjes së biznesmenit.
Familja e Edmond Haxhisë ka dërguar një përfaqësi të tyre tek familja e viktimës.
Ata mësohet se i kanë thënë familjarëve të 50-vjeçarit se nuk kanë pasur asnjë lidhje me ngjarjen dhe nuk ishin në dijeni të planit të Edmond Haxhisë.
Familja Nikulaj u ka kërkuar që të mos qëndrojnë të ngujuar dhe të vijojnë jetën e tyre normalisht, raporton Panorama TV.
Në lidhje me këtë ngjarje janë vënë nën akuzë 6 persona.
Edmond Haxhia dyshohet se ka pasur rolin e organizatorit, shtetasi portugez ishte autori i krimit, ndërsa 4 shtetas britanikë akuzohen se kanë pasur rolin e informatorëve mbi lëvizjet e biznesmenit Ardian Nikulaj.
Katër prej tyre janë vënë në prangat e policisë në Britaninë e Madhe dhe kanë nisur procedurat për ekstradimin e tyre.
Vijojnë të jenë ende në arrati shtetasi portugez i dyshuar për vrasjen dhe 1 prej shtetasve britanikë.
