Në kuadër të fazës së dytë të implementimit të Hartës së re Gjyqësore, nga dita e sotme në vend kanë pushuar së funksionuari 9 gjykata të shkallës së parë dhe prokuroritë përkatëse të këtyre rretheve gjyqësore.
Sipas riorganizimit, nga sot do të mbetën vetëm 13 gjykata nga 22 që ishin në të gjithë vendin dhe ato që do të mbyllen janë në Tropojë, Mat, Kurbin, Krujë, Pukë, Lushnje, Kavajë, Përmet dhe Pogradec.
Dosjet e gjykatës së Tropojës do të transferohen në Kukës, të Matit në Dibër, të Kurbinit në Lezhë, të Pukës në Shkodër, të Krujës në Tiranë, të Kavajës në gjykatën e Durrësit, të Lushnjes në Fier, të Përmetit në Gjirokastër dhe të Pogradecit në Korçë.
Harta e re do të funksionojë me 16 gjykata në total, 13 të Shkallës së Parë, 1 Gjykatë Apeli dhe 2 gjykata Administrative, pasi KLGJ shkriu 18 gjykata, duke reduktuar gjykatat e Apelit në një të vetme në Tiranë, ndërsa nga 5 gjykata Administrative do jenë në vetëm dy, në kryeqytet dhe në Lushnje dhe po ashtu do të ekzistojnë vetëm 13 gjykata të Shkallës së Parë.
Por pavarësisht se Ministria e Drejtësisë dhe KLGJ po vazhdojnë me zbatimin e planit, shkrirja e gjykatës së Kurbinit dhe transferimi i 1600 dosjeve në Lezhë, është kundërshtuar me reagime të ashpra nga avokatët.
Dhoma Vendore e Avokatisë në Lezhë argumenton se mungesa e institucioneve të drejtësisë do të paralizojë mijëra banorë të Kurbinit, të cilëve ju duhet të udhëtojnë drejt qendrës së qarkut për të marrë shërbime.
Një prej avokatëve në Kurbin u shpreh kështu për mediat: “Kjo tregon se në Shqipëri ka monizëm. Bashkimi i gjykatave në 1 është largimi nga llogaridhënia, nuk funksionon asnjë institucion, është platformë e falimentuar. Kjo është në dëm të qytetarëve. Do njoftojmë qytetarët e Kurbinit se bashkë me shërbimet e provës nuk do ofrojmë më shërbim”.
Me hartën e e re gjyqësore qarku i Lezhës do të ketë vetëm një gjykatë dhe prokurori, por ambientet e kufizuara dhe numri i ulët i gjyqtarëve dhe prokurorëve pritet të krijojë kaos dhe vonesa në sistemin e drejtësisë.
