Presidenti i Ukrainës, Volodimir Zelensky, ka publikuar mëngjesin e sotem, pamjet e sulmit më të fundit rus mbi civilët, që i ka marrë jetën edhe fëmijëve.
“Mbrëmë armiku sulmoi përsëri Ukrainën me raketa dhe UAV. Terroristët vunë në shënjestër, civilë dhe objekte, – shkroi Zelenksy në Fb. – Një sulm me raketë në Uman dëmtoi rreth 10 ndërtesa banimi. I gjithë blloku i njërit prej tyre u shkatërrua. Njerëzit janë ende të bllokuar nën rrënoja. Fatkeqësisht, ka viktima, përfshirë një fëmijë.
Në Dnipro, granatimet e terroristëve i morën jetën një fëmije. Ngushëllimet e mia për të gjithë ata që humbën të dashurit e tyre për shkak të terrorit rus!
I jam mirënjohës Forcave tona Ajrore, gjuajtësve tanë kundërajrorë, kujtdo që ndihmon në kapërcimin e pasojave të sulmeve të armikut, kujtdo që mbron njerëzit tanë.
Ky terror rus duhet të përballet me një përgjigje të drejtë nga Ukraina dhe bota. Dhe do të përballet. Çdo sulm i tillë, çdo veprim i keq kundër vendit dhe popullit tonë e afron shtetin terrorist drejt dështimit dhe ndëshkimit, dhe jo e kundërta, siç mendojnë ata. Nuk do të harrojmë asnjë krim, nuk do të lëmë asnjë pushtues të shmangë përgjegjësinë.”- tha Zelensky.
Të paktën 8 persona janë vrarë në valën e re të sulmeve ruse ndaj qyteteve ukrainase, përfshirë edhe kryeqytetin, Kiev, thanë zyrtarët rajonalë dhe ushtarakë.
Në Uman, qytet në rajonin qendror të Çerkasit, sulmet ruse me raketa vranë të paktën gjashtë persona dhe plagosën nëntë të tjerë, tha Ihor Taburets, kreu i administratës ushtarake rajonale.
Raketat goditën një ndërtesë banimi dhe një depo, tha Taburets.
Në Dnipro, qytetin më të madh në brigjet e lumit Dnjepër në Ukrainë, një grua dhe një vajzë e vogël u vranë nga sulmet ruse, pavarësisht se mbrojtja ajrore ukrainase arriti të rrëzonte shtatë raketa, tha Sehir Lysak, kreu i administratës ushtarake për rajonin e Dnipropetrovskit.
Mbrojtja ajrore ukrainase arriti të rrëzonte shumicën e raketave që shënjestruan Kievin, tha kreu i administratës ushtarake për rajonin e kryeqytetit, Serhiy Popko.
“Sipas të dhënave të para, 11 raketa janë shkatërruar në hapësirën ajrore të Kievit. Edhe dy dronë janë rrëzuar”, tha Popko.
Një linjë elektrike është dëmtuar dhe infrastruktura civile po ashtu ka pësuar dëme.
Shpërthime janë raportuar edhe në Kremençuk dhe Potava në Ukrainën qendrore, dhe në Mikolajiv, në jug të shtetit.
Që nga nisja e pushtimit shkurtin e vitit të kaluar, Rusia ka mohuar se shënjestron civilët, pavarësisht provave që dëshmojnë të kundërtën. Ndërkaq, luftime të ashpra raportohet se po vazhdojnë në vijën e frontit Bahmut-Avdijivka-Marjinka në lindje, tha ushtria ukrainase më 28 prill.
