Kandidati i koalicionit “Bashkë Fitojmë” dhe njëkohësisht kryebashkiaku i Shkodrës Bardh Spahia, deklaroi në një emision televiziv se Shkodra ka nevojë për ndryshim, ndërsa shtoi se është një nga bashkitë më të persekutuara të viteve të fundit.
Ai ka komentuar edhe deklaratën e kryeministrit Edi Rama, i cili tha se bashkitë e djathta do të përballen me mungesë fondesh nga qeveria pas 14 majit.
Spahia tha se një deklaratë e tillë është në kundërshtim me ligjet dhe Kushtetutën e vendit, ndërsa shtoi se institucionet të cilat merren me vëzhgimin e situatës të të drejtave të njeriut të veprojnë.
Në lidhje me kundërshtarin e tij në garë për qytetarin e parë të Shkodrës, Spahia tha se ka pasur disa herë mundësinë në sajë të posteve që ka mbajtur për të treguar vëmendje ndaj qytetit, gjë që nuk e ka bërë.
“Shkodra nuk mund të merret me deklarata apo dëshira, nëse merret do të merret me punë e tregim të vullnetit për të bërë diçka të mirë për qytetin. Mazhoranca ka treguar komplet të kundërtën vitet e fundit. Shkodra është bashkia më e persekutuar në vitet e fundit. Çdo ditë e më shumë shkodranët të fokusuar tek domosdoshmëria e ndryshimit të një realiteti të zymtë. Shkodra vuan problematika të thella ekonomike e jo vetëm. Kandidati rival, një njeri që herë pas here ka humbur rastin të tregojë vëmendje karshi qytetit edhe pse ka mbajtur poste të rëndësishme”, tha Spahia.
