Propozimi i presidentit të Këshillit Evropian, Donald Tusk për të hequr kuotat e detyrueshme për zhvendosjen e azilkërkuesve në të gjithë Bashkimin Evropian është i papërshtatshëm, i parakohshëm dhe i panevojshëm, deklaroi dje kryeministri, Aleksis Cipras gjatë një interviste për televizionin shtetëror grek ERT3.
Ai shtoi se Greqia nuk do të pranonte asnjë ndryshim në marrëveshjen aktuale dhe se propozimi kishte shumë pak gjasa që të miratohej nga krerët e BE-së në samitin e ardhshëm, në Bruksel.
Gjithashtu, ai kujtoi se në vitin 2015, Greqia është përballur me valën më të madhe të migracionit që prej Luftës së Dytë Botërore.
Duke folur rreth kushteve të jetesës në pesë ishujt e Egjeut Lindor që kanë pranuar shumicën e refugjatëve, kryeministri grek, Cipras pranoi se situata nuk ka qënë e lehtë të menaxhohet.
“Ne duhet të zbatojmë një marrëveshje të vështirë me procedura objektive të komplikuara dhe që kërkojnë kohë”, tha Cipras për televizionin shtetëror grek ERT3.
Cipras pranoi dyshimet që kanë shfaqur autoritetet lokale dhe banorët e ishujve ndaj çështjes së migracionit duke shtuar se qeveria ishte “në anën e tyre ” dhe kërkuar bashkëpunimin e tyre sepse nëse marrëveshja BE-Turqi do të dështonte ata do të ishin të parët që do të mbanin barrën.
Gjithashtu, Cipras theksoi se qeveria ka hartuar një plan për të lehtësuar mbingarkesën e ishujve.
“Për sa i përket daljes së Greqisë nga programi i shpëtimit në vitin 2018, unë do të jetë i pari që do ta nxjerrë vendin nga memorandumet që na kanë përfshirë vendet e tjera”, shtoi kryeministri grek, Cipras./atsh/
