Dalin detaje të reja nga vrasja e Ardian Nikulajt i cili u ekzekutua mesditën e 19 prillit në ambientet e lokalit të tij në “Coral”.
Ruben Sariva ka hyrë në territorin e vendit tonë më 11 shkurt 2023 dhe nuk është larguar deri në mbrëmjen e 19 prillit 2023, ku është kapur nga kamerat e sigurisë në pikën kufitare të Kapshticës në orën 21:25 duke kaluar kontrollin me pasaportë në dorë dhe me këmbë ka hyrë në brendësi të kufirit grek.
Ai dyshohet se me një mjet tjetër është larguar fillimisht drejt Selanikut dhe me linjën ajrore greke “Aegean Airlines” ka fluturuar drejt ishullit të Rodosit që ndodhet shumë afër me Turqinë.
Së fundmi mediat kanë publikuar foton e Ruben Sariva (dyshohet ekzekutori i Ardian Nikulajt), i cili ka postuar në rrjetet sociale një fotografi ku duket i pashqetësuar teksa drejton motorin e tij në Greqi.
Policia e Shtetit diten e djeshme doli me një deklaratë zyrtare ku njoftoi se gjithçka ishte planifikuar nga vëllezërit Lestakaj, me të cilët Nikulaj ishte në hasmëri që prej vitit 1997.
Dyshohet se Lestakajt kishin paguar një skuadër të huajsh për të ardhur për të kryer vrasjen. Sipas të dhënave të PSH-së, në rolin e ekzekutorit ishte portugezi Ruben Saraiva, ndërsa katër britanikë ishin vëzhgues.
Autorët e dyshuar të krimit të rëndë policia i ka identifikuar si: Harry Simson, Thomas Mithan, Steven Hunt dhe Harriet Bridgeman. I gjithë ekipi menaxhohej nga Edmond Haxhia, djali i dajës i vëllezërve Lestakaj. Por, deri më tani asnjë prej të përfshirëve nuk janë arrestuar. Të gjithë janë larguar nga Shqipëria.
- Zbërthehet dëshmitarja: Motorin e bleva te “21 Dhjetori”, portugezi fliste shqip
Grupi që realizoi vrasjen e biznesmenit 50-vjeçar Ardian Nikulaj është “tradhëtuar” nga një vajzë, e cila është e njohura e Edmond Haxhisë, personi që dyshohet se është organizatori i ngjarjes së ndodhur mesditën e 19 prillit në lokalin “Coral”.
Kjo vajzë ka dhënë dëshminë e saj në polici dhe besohet se ka zbuluar të gjitha provat e nevojshme që kanë çuar grupin hetimor drejt zbardhjes së grupit të huaj që kreu ekzekutimin.
Vajza, e cila raportohet se është paraqitur vetë në polici ka zbuluar se: “fillimisht portugezi Ruben Saraiva është dërguar në një hotel në zonën e Shëngjinit, shumë pranë “Coralit”, ndërsa të nesërmen e kanë çuar në Shkodër”.
Sipas dëshmisë së vajzës, motori “skuter” që është përdorur nga autori për t’u larguar nga vendngjarja është blerë në Tiranë, tek zona e “21 Dhjetorit” dhe është blerë me kontratë noteriale.
“Motorin e kam blerë unë, e kam parë më vonë te magazina e shtëpisë së Edmondit në Kakarriq të Lezhës”, ka rrëfyer ajo.
“Dy numrat me të cilët ka komunikuar Edmond Haxhia, janë regjistruar në emër të një vajze nga fshati Zejmen Lezhë, e cila punon si menaxhere e një lokali në Tiranë. Portugezi përshëndeste gjithmonë banorët e Kakarriqit në gjuhën shqipe, por me Edmondin komunikonte në anglisht”, ka zbuluar ajo më tej.
Sakaq, policia nga ekspertimi i objekteve të sekuestruara në dhomën 302 të një hoteli, ku ka qëndruar shtetasi anglez Harry Simpson dhe në automjetin me targa AA837 ZM, të përdorur nga Edmond Haxhia, kanë gjetur një veshje hixhab grash, dhe është përftuar një profil biologji, i cili është i njëjtë me profilin biologjik të një çamçakëzi të gjetur në magazinën e të akuzuarit si porositës i vrasjes.
Ndërkohë, nga filtrat e cigareve të gjetura në dhomën e hotelit ku ka qëndruar Simpson, është përftuar profil biologjik, i njëjtë me atë të gjetur në dorezat e sekuestruara në bagazhin e mjetit që kishte marrë me qira Edmond Haxhia.
Sa i përket vrasësit portugez ai ka hyrë në Shqipëri në orën 19:26 nga Rinasi në datë 14.02.2023, dhe ka dalë në datën 19.04.2023 ora 19:26, nga dogana e Kapshticës si këmbësor.
Detaje/ Edmond Haxhia është filmuar pranë aeroportit të Rinasit me grupin e vrasësve të Nikulajt
