Hakmarrja ishte pista kryesore e hetimit që policia ndoqi për të zbuluar autorin e vrasjes së Ardian Nikulajt më 19 prill, në ambientet e lokalit “Coral” në pedonalen e Shëngjinit.
Hetuesit kanë dyshuar për gjakmarrje, pasi konflikti mes dy familjeve të njohura në Lezhë, Lestakaj dhe Nikulaj, vijonte prej mbi dy dekadash dhe kishte marrë tanimë 3 jetë nga të dy palët.
Në lidhje me këtë konflikt të mbartur mes dy fiseve, tre ditë pas ngjarjes foli në emisionin “Revieë” në EuroneësAlbania, Nertila Haxhia, vajza e dajës së Elton dhe Klodian Lestakaj, të cilët po ashtu u prononcuan duke mohuar të kenë kryer vrasjen e biznesmenit për të marrë hak.
Haxhia i shprehu ngushëllime familjarëve dhe tha se ata nuk kanë frikë, pasi nuk kanë asnjë lidhje me vrasjen e Ardian Nikulaj, ndërsa rrëfeu një ofertë që sipas saj i ndjeri ia kishte bërë vite më parë pasi familja Lestakaj e akuzoi publikisht se 50-vjeçari i kishte marrë jetën dy të afërmeve të tyre, Gëzim Lestakaj dhe Lauren Lestakaj.
“Më lejoni të shpreh ngushëllimet e mia ndaj familjes Nikulaj për humbjen e familjarit të tyre. Unë e shikoj së pari vrasjen e një qytetari. Jam e ftuar si e afërmja e disa qytetarëve, as e një politikani apo eksponenti politik. Ne nuk kemi patur frikë. Dua të sqaroj pozicionin tim në këtë dosje. Unë jam vajza e dajës e Elton Lekstakaj dhe nuk kam lidhje me fisin Lestakaj. Ne jemi të qetë sepse nuk kemi përgjegjësi dhe nuk kemi diçka për të cilën shqetësohemi, në momentin që jemi të pastër dhe heqim përgjegjësinë nga kjo ngjarje. Ne na shqetëson vetëm ajo ngjarje, ajo dosje, ku janë vrarë të afërmit tanë”, tha ajo në emision.
Sakaq që prej ditës së ngjarjes, Nertila Haxhia ka qenë vazhdimisht aktive në profilin e saj në Facebook, duke kërkuar gjetjen e autorëve nga policia e shtetit dhe heqjen e përgjegjësisë nga familja e tyre pasi sipas saj kërkonin vetëm hetimin e Nikulajt dhe jo hakmarrje.
Ndërkohë, ditën e sotme pasi policia ka shpallur në kërkim të afërmin e saj Edmond Haxhia si porositësin e vrasjes së Nikulajt nga një skuadër “killerash” prej Birmingamit, Nertila Haxhia ka shpërthyer në Facebook kundër hetuesve.
Ajo shprehet se drejtori i Policisë së Shtetit, Muhamet Rrumbullaku i ka borxh cënimin e emrit të familjes së babait, pasi po i akuzon si financues vrasjesh. Sipas Nertila Haxhisë, Rrumbullaku ka në dorë emrat e vrasësve të vërtetë prej tre ditësh sipas dëshmisë së vajzës, por refuzon t’i arrestojë.
Haxhia gjithashtu shprehet se se kushëriri i saj Edmondi, për të cilën është lëshuar urdhër-arresti nuk është porositësi i vrasjes dhe se ai është fukara që nuk ka bukë për të ngrënë, dhe nuk zotëron asnjë biznes siç raportohet.
Më tej, ajo akuzon hetuesit në policinë e Lezhës se kanë detyruar nëpërmjet presioneve vajzën (dyshohet e dashura e Edmond Haxhisë) që të dëshmojë sikur ai zotëron pasuri dhe ka paguar portugezin Ruben Saraiva që të kryejë ekzekutimin.
