Kandidati opozitar i koalicionit “Bashkë Fitojmë”, Lefter Maliqi u ka premtuar punonjësve të Bashkisë së Kuçovës paga më të larta pas fitores më 14 maj.
Maliqi shkruan se çdo punonjës i bashkisë së Kuçovës do t’i rritet paga me vlerën e 100 mijë lekëve të vjetra, ndërsa u ka bërë thirrje qytetarëve që të mos tundohen nga presioni i pushtetit por të votojnë të lirë për ndryshimin.
Gjithashtu Maliqi shkruan se do ta shndërrojë zyrën e kryetarit në shërbim të popullit dhe halleve të tyre madje nuk do të ndalen investimet në qytet dhe fshatrat përreth.
Reagimi i plotë nga Lefter Maliqi:
“Një hap pranë Bashkisë! Bashkia Kuçovë “Kantier Ndërtimi”!
Të nderuar punonjës së Bashkisë, ju garantoj paga 100 mijë Lekë më të larta, pasi i keni më të ultat se çdo Bashki tjetër. Ju garantoj kushte shumë më të mira pune dhe mbështetje të plotë duke ju ri-kthyer dinjitetin.
Mos u tundoni nga presionet dhe shpifjet e karriges së bërë pis me paaftësi, korrupsion dhe imoralitet, por qëndroni dinjitoz se nuk ju heq njeri nga puna. Votoni të lirë kë të doni! Vota është e fshehtë.
Nga puna do të ikin vetëm të paaftët dhe ata që po shantazhojnë dhe joshin banorët kundra së ardhmes së Kuçovës! Kuçova e Para! Së bashku do jemi në shërbim të banorëve. Zyra e Kryetarit do të zhvendoset në katë të parë në kontakt të drejtpërdrejtë me banorët dhe e hapur në çdo kohë. Nuk do të ketë polic para Bashkisë. Bashkia i përket banorëve.
Së bashku do jemi në sherbim të tyre dhe ndryshimit të madh të menjëherëshëm, që do ndodh në qytet dhe fshat, me investime kudo, duke i shërbyer çdo banori të majtë dhe të djathtë. Koha për vepra!”, shkruan Maliqi.
